Волонтерлік тәжірибе еңбек өтіліне есептелуі мүмкін
Қазақстанда волонтерлік тәжірибені еңбек өтіліне есептеу мүмкіндігі қарастырылуда. Бұл туралы жалпыұлттық онлайн-марафон барысында ҚР Мәдениет және ақпарат вице-министрі Евгений Кочетов мәлімдеді.
Вице-министрдің айтуынша, волонтерліктің Конституцияда бекітілуі — Қазақстанның бірегей тәжірибесі. Қазіргі уақытта министрлік волонтерлерді қолдау шараларын, оның ішінде оларды сақтандыру тетігін әзірлеп жатыр.
«Сондай-ақ волонтерлік тәжірибені жұмысқа орналасу кезінде еңбек өтілі ретінде есептеу мәселесімен жұмыс істеп жатырмыз. Бұл әсіресе студенттер үшін пайдалы болмақ», — деді Кочетов.
Бұған дейін елімізде волонтерлер саны 300 мыңнан асқаны хабарланған болатын.
