Түркістанның 534 тонна өнімі Алматы жәрмеңкесіне жол тартты

ТҮРКІСТАННЫҢ БЕРЕКЕЛІ ӨНІМІ АЛМАТЫҒА ЖОЛ ТАРТТЫ

Түркістанның даласынан шыққан 534 тонна ауыл шаруашылығы өнімі Алматы төріне жол тартты. 31 автокөліктен құралған керуен 29–30 тамыз күндері Алматыда өтетін жәрмеңкеге өңірдің еңбегін ала барады.

Керуендегі өнімнің көлемі де, түрі де аз емес. 23 тонна жылқы еті, 21,5 тонна қой еті, 20 тонна сиыр еті, 5 тонна түйе еті, 15 тонна шұжық өнімдерімен қатар, қызанақ, қияр, қарбыз, пияз, сәбіз, болгар бұрышы, баклажан және басқа да өнімдер жеткізіледі.

Ең бастысы – бұл жәрмеңке жай ғана сауда емес. Өңір шаруалары өз өнімін делдалсыз тұтынушыға ұсынуға мүмкіндік алады. Ал Алматы тұрғындары сапалы отандық өнімді нарықтағы орташа бағадан 15–20 пайызға төмен бағамен сатып ала алады.

Бұл Түркістанның аграрлық әлеуетінің жыл сайын артып келе жатқанын да көрсетеді. Биылғы қаңтар–шілде айларында облыста 458,8 млрд теңгенің ауыл шаруашылығы өнімі өндіріліп, нақты көлем индексі 111,1 пайызды құрады. Осы көрсеткіш бойынша Түркістан облысы республикада бірінші орынға шықты.

Өңір агроөнеркәсіпке инвестиция тартудан да жоғары нәтижеге қол жеткізді. Жеті айда салаға 161,6 млрд теңге инвестиция тартылып, өткен жылдың сәйкес кезеңімен салыстырғанда 1,4 есеге артқан. Ал жыл басынан бері Түркістаннан 904,5 мың тонна ауыл шаруашылығы және қайта өңделген өнім экспортталды. Бұл – өткен жылмен салыстырғанда екі есе көп.

Мал шаруашылығындағы көрсеткіштер де көңілге қонымды. Қазақстандағы ірі қараның 13 пайызы, қой-ешкінің 20 пайызы, жылқының 10 пайызы және түйенің 14 пайызы Түркістан облысына тиесілі. Биылдың өзінде өңірден шетел нарығына 17,5 мың тонна сиыр еті мен 17,4 мың тонна қой еті экспортталған.

Яғни Алматыға аттанған керуен – бір жәрмеңкенің ғана жүгі емес. Оның ішінде Түркістан шаруасының еңбегі, өңірдің өндірістік мүмкіндігі және отандық өнімнің нарықтағы орны бар.

Алда ұзақ жол. Әр ауданнан аттанған шаруалардың еңбегі енді Алматыдағы жәрмеңке сөрелерінен орын алады. Керуеннің діттеген жері – Алматы, ал мақсаты – Түркістанның аграрлық әлеуетін танытып, өнімді тұтынушыға делдалсыз жеткізу.

Сапар барысынан ақпараттарды turkmedia.kz сайтынан оқыңыз.