Субсидияланатын жұмыс орындарын ұйымдастыру тәртібі жаңартылды
Қазақстанда субсидияланатын жұмыс орындарын ұйымдастыру тәртібіне өзгерістер енгізілді. Еңбек және халықты әлеуметтік қорғау министрлігінің жаңа қағидаларына сәйкес, жұмыс берушілерге қойылатын талаптар икемді бола түсті, ал негізгі рәсімдер толығымен электронды форматқа көшірілді.
Субсидияланатын жұмыс орындарын мансап орталықтары жұмыс берушілердің өтініші негізінде ұйымдастырады. Бұл бағдарламаға коммерциялық заңды тұлғалар, жеке кәсіпкерлер, шаруа және фермер қожалықтары, әлеуметтік кәсіпкерлер, мемлекеттік мекемелер, сондай-ақ мемлекет үлесі 50 пайыздан асатын заңды тұлғалар қатыса алады. Үкіметтік емес ұйымдар да тізімнен тыс қалмаған.
Жұмыс берушілердің әр санатына жеке талаптар белгіленген. Алайда барлығына ортақ шарттар да бар: кемінде 12 ай жұмыс істеу, банкроттық рәсімінде болмау, экстремизмге қарсы заңнаманы сақтау және бұрынғы келісімшарттарды тиісінше орындау. Сондай-ақ бюджеттен қаржыландырылатын ұйымдарда, мысалы, жан басына шаққандағы қаржыландыру немесе инфрақұрылымдық сатып алулар аясында субсидияланатын жұмыс орындары ашылмайды. Бұл қаражаттың қайталанып жұмсалуын болдырмау үшін жасалған.
Субсидияланатын жұмыс орындарының саны жұмыс берушінің санатына байланысты. Үкіметтік емес ұйымдар республикалық маңызы бар қалаларда 1-ден 10-ға дейін, ал өңірлерде 1-ден 5-ке дейін жұмыс орнын аша алады. Коммерциялық құрылымдар, жеке кәсіпкерлер, шаруа қожалықтары мен әлеуметтік кәсіпкерлер үшін шектеу 1-ден 5-ке дейін. Мемлекеттік органдар мен квазимемлекеттік сектор субъектілеріне де осындай сан қарастырылған. Ал ауылдық әкімдіктер мен коммуналдық кәсіпорындарда жұмыс орындарының саны ауыл тұрғындарының санына байланысты — жалпы халықтың 2-5 пайызы.
Енді барлық рәсім Электрондық еңбек биржасы арқылы жүргізіледі. Жұмыс берушілерді іріктеу, азаматтарды жұмыс орындарына жолдау және құжаттарды тексеру — бәрі онлайн режимде. Бұл қағазбастылықты азайтып, процестің ашықтығын арттырады және адами фактордың әсерін шектейді.
Жаңа тәртіп субсидияланатын жұмыс орындарын нақты қажеттілікке қарай бөлуге, рәсімдердің ашықтығын қамтамасыз етуге және бюджет қаражатын тиімді пайдалануға бағытталған.
