Нұржан Қалжан 2009 жылғы жол апатынан кейінгі ауыр кезеңді еске алды

Әнші Нұржан Қалжан «1001 түн» бағдарламасында сұхбат беріп, 2009 жылы болған жол апатынан кейінгі қиын кезеңді еске алды.

Ол көлікте бірге отырған достарынан айырылған соң өзін кінәлап, ауыр кезеңді бастан өткергенін айтты. Айтуынша, ол уақытта өнер туралы ойлауға мұршасы болмаған.

«Жол апатынан кейін дәрігерлер ән айта алмай қалуым мүмкін екенін айтты, бірақ нақты диагноз қойылмады. Өйткені мойныма темір қойылған, ол қазір де тұр. Бірақ ол уақытта ән туралы ойлауға шама болмады. Сол жол апатында менің жанымдағы достарым кетіп қалды. Олардың қатарында журналист Руслан Бөлебай да бар. Бір көлікте болдық. Достарымнан айырылып қалғаным қатты жаныма батты. Өзімді кәналаған сәттер болды. Өйткені мен рөлде болдым. «Олар аман қалып, мен кетіп қалғанда» деген де ойлар келді», — дейді әнші.