«Күміс жас» жобасы: 9,2 мыңнан астам азамат жұмыспен қамтылды

«Күміс жас» бағдарламасы аясында биыл 9,2 мыңнан астам қазақстандық жұмысқа орналасты. Бұл жылдық жоспардың 92 пайыздан астамын құрайды.

Жобаға қатысу үшін 50 жастан асқан, жұмыс іздеп жүрген және Мансап орталығында тіркелген азаматтар өтініш бере алады. Жұмысқа орналасу мерзімі 36 айға дейін созылады.

Ең көп қатысушы Түркістан, Қарағанды, Ақтөбе және Жамбыл облыстарында тіркелген. Қатысушылардың 54,4 пайызы – әйелдер, ал 63,2 пайызы – ауыл тұрғындары.

Мемлекет жұмыс берушіге қызметкер жалақысының бір бөлігін субсидиялайды. Ай сайынғы субсидия 30 АЕК-тен аспайды. Субсидия мөлшері үш жыл ішінде біртіндеп төмендейді: бірінші жылы – 70 пайыз, екінші жылы – 65 пайыз, үшінші жылы – 60 пайыз.

Бағдарламаның басты талабы – жоба аяқталғаннан кейін жұмыс беруші қызметкерді тұрақты жұмыс орнымен қамтамасыз етуі тиіс. Зейнеталды жастағы қатысушыларға бағдарлама аяқталған соң кемінде бір жыл тұрақты жұмыс істеуге мүмкіндік беріледі. Ал 58 жастан асқан азаматтар зейнет жасына жеткенге дейін жұмысын жалғастыра алады.