Алты баланың анасы әрі полиция майоры «Күміс алқа» төсбелгісін алды

Павлодар облысының полиция майоры Әсел Аубакирова «Күміс алқа» төсбелгісімен марапатталды. Құрметті мемлекеттік марапатты оған облыстық полиция департаментінің бастығы Василий Скляр табыстады.

Әсел Аубакирова — көпбалалы ана әрі тәжірибелі офицер. Ол ішкі істер органдарында 22 жыл бойы қызмет етіп келеді. Оның тәрбиесінде алты бала бар: үлкен ұлы 15 жаста, ал кенже ұлы Исмаилға небәрі бір жарым жыл.

Марапаттау рәсімінде департамент бастығы ананың қоғамдағы рөліне тоқталды. «Ана — ұлттың тірегі, отбасының берекесі. Сіз тәуелсіз Қазақстанның болашақ ұрпағын тәрбиелеп, ұл-қыздарыңыздың және бүкіл елдің игілігі үшін еңбек етіп келесіз. Балаларыңыз сіздің үмітіңізді ақтап, елге лайықты азамат болып өсіп, Отанымыздың мақтанышына айналсын», — деді Василий Скляр.

Әсел Аубакирова өз кезегінде марапатқа ризашылығын білдірді. «Мен өз жұмысымды өте жақсы көремін әрі бағалаймын. Штабтағы қызмет оңай емес. Мұнда аналитикалық ойлау, бастамашылдық, объективтілік пен бейтараптық, мәселенің мәніне терең үңілу және жедел жағдайдағы кез келген өзгеріске дер кезінде әрекет ету қабілеті қажет. Бүгін осындай құрметті марапатқа ие болғаныма өте қуаныштымын. Көпбалалы ана болу және сонымен қатар полицияда қызмет ету — бүкіл отбасымның еңбегі. Жұбайымның, ата-әжелеріміздің қолдауы мен түсіністігі болмаса, үйде де, қызметте де бәріне үлгеру қиын болар еді», — деді ол.

Әсел Аубакирова секілді қызметкерлер қазақстандық полицияның жаңа бейнесін қалыптастырып келеді. Олар — қызметіне адал, қайсар әрі отбасы құндылықтарын берік ұстанатын жандар. Майордың кителіндегі «Күміс алқа» — оның ана ретіндегі еңбегі мен қызметтегі табысының жарқын белгісі.