Қазақстанның қаржылық стресс индексі: АКРА негізгі тәуекелдерді атады
АКРА Қазақстанның қаржылық стресс индексіне шолу жасап, сыртқы сауда балансының нашарлауы мен экспорттық түсімнің азаюын негізгі тәуекелдер деп атады.
Аналитикалық несие рейтингтері агенттігі (АКРА) Қазақстанның қаржылық стресс индексіне шолу жасап, негізгі тәуекелдерді атады. Сарапшылардың пікірінше, ел экономикасына елеулі қауіп төндіретін факторлардың бірі – сыртқы сауда балансының нашарлауы.
Таза экспорттың қысқаруы ағымдағы шот тапшылығын ұлғайтып, ұлттық валютаға қосымша қысым жасауы мүмкін. Қазақстанның ағымдағы шот тапшылығы 2026 жылдың бірінші тоқсанында 2,01 млрд долларды құрады. Бір жыл бұрын бұл көрсеткіш 1,04 млрд доллар болған еді, яғни тапшылық бір жылда шамамен екі есеге өскен.
АКРА сарапшылары экспорттық валюталық түсімнің азаюын да тәуекел ретінде атап өтті. Бұл корпоративтік сектордың қарыз жүктемесін өтеу мүмкіндігін әлсіретуі ықтимал. Сонымен қатар теңге бағамының құбылмалылығы жоғары деңгейде қалып отыр.
Сарапшылардың пайымдауынша, валюта нарығына әлемдік саудадағы белгісіздік, протекционизмнің күшеюі және мұнай бағасының құбылуы әсер етуі мүмкін. Шілде айының басында қаржылық стресс индексі көктемгі өсімнен кейін біршама төмендеген, алайда оның деңгейі 2024-2025 жылдардағы көрсеткіштерден әлі де жоғары.
Осыған қарамастан, АКРА Қазақстан қаржылық дағдарыс шегінде тұр деп есептемейді. Агенттік қазіргі тәуекелдердің негізінен сыртқы факторлар мен нарықтағы құбылмалылыққа байланысты екенін атап өтті.
