Қазақ ғалымдары мәрмәр қой етін өндірудің жаңа технологиясын ұсынды

«Қазақ қайта өңдеу және тамақ өнеркәсібі ғылыми-зерттеу институты» ЖШС мамандары қазақтың биязы жүнді қой тұқымынан мәрмәр ет алудың кешенді әдісін жасап шықты. Бұл — «Ұлттық аграрлық ғылыми-білім беру орталығы» КЕАҚ құрамындағы институттың жаңа жетістігі.

Технология қозыларды қарқынды семіртуге негізделген. Ғалымдар дәнді дақылдар, ақуыз, пробиотиктер, өсімдік қоспалары, премикстер мен минералдар кіретін теңгерімді жем құрастырған. Бұл азық малдың күнделікті салмақ қосуын жақсартып, зат алмасуды тұрақтандырып, бұлшық ет ішіндегі майдың біркелкі орналасуына ықпал етеді.

Зерттеу нәтижесінде қой тұқымының генетикалық мүмкіндігі толық ашылды. Қозы етіндегі май мөлшері 4-6 пайызға жеткен, ал дәстүрлі жайылымда өсірілген малда бұл көрсеткіш 2-3 пайыз ғана. Осының арқасында еттің мәрмәрлігі артып, шырындылығы мен жұмсақтығы жақсарған.

Сойыс көрсеткіштері де жақсарған: құнды ет бөліктерінің үлесі артып, бұлшық ет пен майдың арақатынасы оңтайланған. Бұл өнімнің тауарлық құнын көтеріп, экспортқа шығару мүмкіндігін арттырады.

Жаңа әдіс қозыларды өсіру мен бордақылаудың барлық кезеңін қамтиды. Ұсынылған жем құрамы малдың тез өсуіне, зат алмасудың тұрақтылығына және етте мәрмәр құрылымның пайда болуына жағдай жасайды.

Алынған мәрмәр ет экспорттық сапа талаптарына сай. Технологияны еліміздің қой шаруашылығы кәсіпорындарына енгізуге болады. Әзірлеме екі патентпен расталып, ғылыми мақалаларда жарияланған.

Бұл технологияны өндіріске енгізу етті қой шаруашылығын дамытып, қосылған құны жоғары өнім көлемін арттырып, елдің экспорттық әлеуетін күшейтеді.