Елімізде 62 электр көлігін қуаттандыру станциясы жұмыс істейді

Қазақстанның 13 өңірінде негізгі автомобиль бағыттары бойында 62 электр көліктерін қуаттандыру станциясы (ЭҚС) орналасқан. Бұл станциялар өңірлер арасында жүретін электромобиль иелеріне қолайлы жағдай жасауға бағытталған.

Станциялардың ең көбі Алматы және Жамбыл облыстарында — әрқайсысында 12-ден, ал Ақмола және Қарағанды облыстарында — 8-ден орнатылған. Сонымен қатар, Атырау, Жетісу, Батыс Қазақстан, Қостанай, Қызылорда, Маңғыстау, Павлодар, Солтүстік Қазақстан және Түркістан облыстарында да ЭҚС жұмыс істейді.

Желі елдің әртүрлі көлік бағыттарын қамтиды. Мысалы, «Астана – Алматы» автожолында 13 станция, «Астана – Петропавл» бағытында 7, ал «Алматы – Өскемен» трассасында 6 станция орналасқан.

Халықаралық көлік дәліздері бойында зарядтау инфрақұрылымын дамытуға ерекше көңіл бөлінеді. «Батыс Еуропа – Батыс Қытай» халықаралық автожолы бойында 19 электр зарядтау станциясы орнатылған.

Орнатылған ЭҚС-тардың қуаты 60-тан 320 кВт-қа дейін жетеді. Бұл электромобиль иелеріне республикалық және халықаралық бағыттар бойынша сапарларын алдын ала жоспарлауға мүмкіндік береді.

ЭҚС желісін кеңейту жұмыстары жалғасуда. 2026 жылға арналған жоспарда халықаралық және республикалық маңызы бар автомобиль жолдарының бойында 27 жаңа автожанармай құю станциясын салу көзделген, ал электр көліктерін қуаттандыру станцияларын сол нысандарда орналастыру жоспарланған. Мысалы, «Батыс Еуропа – Батыс Қытай» автожолының бойында 7 ЭҚС орнату жоспарлануда.

Көлік министрлігі жол саласындағы ұйымдармен және жергілікті атқарушы органдармен бірлесіп, жаңа объектілер салу және қолданыстағыларды Ұлттық стандарт талаптарына сәйкестендіру мәселелері бойынша жол бойындағы сервис нысандарының инвесторлары мен иелерімен жұмыс жүргізуде.