Coursera-дағы курстардың 40 пайызы қазақ тілінде
Coursera-дағы қазақ тіліндегі курстар саны 8 мыңнан асып, барлық курстың 40 пайызын құрады. Жоба аясында 267 мыңнан астам адам курс аяқтаған.
Астанада Coursera платформасындағы қазақ тіліндегі курстар саны 8 мыңнан асқаны мәлім болды. Бұл көрсеткіш барлық курстардың шамамен 40 пайызын құрайды.
Бұл дерек «Қазақ тілі» қоғамы мен OpenAI компаниясы бірлескен жобасының нәтижелерін таныстыру барысында айтылды. Bilim Upskill компаниясының атқарушы директоры Әсел Мұхамеджанова осы жайында хабарлады.
«Coursera — қазақ тілінде» жобасы 2023 жылы «Қазақстан халқына» қоғамдық қорының қолдауымен іске қосылған. Алғашқы кезеңде еліміздің 25 университеті қатысқан.
— Біздің басты мақсатымыз — студенттерге әлемнің үздік университеттері мен компаниялары әзірлеген сапалы білімді қазақ тілінде алуға мүмкіндік жасау. Біз тек Алматы мен Астанамен шектелмей, барлық облысты қамтыдық. Себебі сапалы білім адамның тұратын жеріне байланысты болмауы керек, — деді Әсел Мұхамеджанова.
Жобаның алғашқы жылында 102 курс қазақ тіліне аударылып, 4,5 мыңға жуық курсқа қазақша субтитр қосылған. 2024 жылы Ғылым және жоғары білім министрлігі қолдау білдіріп, қатысушы жоғары оқу орындарының саны 93-ке жеткен. Сол жылы тағы 20 курс аударылған.
2025 жылдан бастап Coursera курстарына қазақ тіліндегі дубляж енгізілді. Сонымен қатар қазақ тілі платформадағы контент аударылатын 40 тілдің қатарына қосылды.
— Бұл нені білдіреді? Енді қазақ тіліндегі контентті тек біздің команда ғана аудармайды. Жаңа курстар Coursera технологиялары арқылы да қазақ тілінде қолжетімді болады. Бүгінде жобаға 100 университет қатысады, — деді компанияның атқарушы директоры.
Жобаның мақсаты тек курстарды аударумен шектелмейді. Coursera курстары қазақстандық университеттердің оқу бағдарламаларына енгізіліп, студенттердің нәтижесі академиялық кредит ретінде есептелінеді.
Үш жыл ішінде 267 мыңнан астам адам кемінде бір курсты аяқтап, 600 мыңға жуық сертификат алған. Оның 140 мыңнан астамы қазақ тіліндегі курстар бойынша берілген. Сондай-ақ 211 мыңнан астам академиялық кредит есептелген.
Қазақстандық университеттер де Coursera платформасына өз контентін шығарып жатыр. Қазір 18 отандық университеттің 40 авторлық курсы платформада жарияланған, оның жартысы қазақ тілінде. Бұл курстарға 15 мыңнан астам студент тіркеліп, 11 мыңнан астам сертификат берілген.
Бұған дейін Қазақстан Coursera шешімі негізінде ұлттық цифрлық білім беру платформасын құратыны хабарланған еді.
