Азия кубогы: Қазақстан велоспортшылары 11 медаль жеңіп алды

Бангкокта тректегі велоспорттан Азия кубогы мәресіне жетті. Бұл додаға қатысқан қазақстандық спортшылар жасөспірімдер арасында бақ сынап, қоржындарына 5 алтын, 3 күміс және 3 қола медаль салды.

ҚР ҰОК мәліметінше, Аружан Қабдулова із кесу сайысында топ жарса, ұпай үшін өткен жарыста да жеңімпаз атанды. Мансұр Бралин кейринде бас жүлдені иеленді.

Командалық спринтте Зейнолла Азаматұлы, Илья Куварин және Мансұр Бралин үздік шығып, тағы бір алтынды еншіледі. Жекелей спринтте Илья Куварин бірінші орынға тұрақтады.

Күміс жүлделерді Аружан Қабдулова (скрэтч), Виталина Хоружая (ұпай үшін жарыс) және Зейнолла Азаматұлы (із кесу) жеңіп алды. Ал қола медальдарды Виталина Хоружая мен Әлихан Жүнісов (скрэтч), сондай-ақ Мансұр Бралин (жекелей спринт) қанжығаларына байлады.