Астанада үш облыстың шаруалары 1600 тоннадан астам азық-түлік әкелді
Астанада Қазанат ипподромында үш облыстың шаруалары 1 600 тоннадан астам азық-түлік әкелген жәрмеңке 18 қазанға дейін жалғасады.
Елордадағы Қазанат ипподромында (Қарқаралы көшесі, 1) Павлодар, Солтүстік Қазақстан және Ұлытау облыстарының тауар өндірушілері қатысқан ауыл шаруашылығы жәрмеңкесі ашылды. Жәрмеңкеге әкелінген азық-түліктің жалпы көлемі 1 600 тоннадан асты.
Жәрмеңке 18 қазанға дейін жалғасады, сауда екі күн бойы сағат 09:00-ден 18:00-ге дейін жүргізіледі. Бұл туралы елорда әкімдігі хабарлады.
Павлодар облысынан 110 тонна ет және ет өнімдері, 440 тонна көкөніс, 17 тонна сүт өнімі, 24 тонна бакалея, 14 тонна балық, 10 тонна бал және 100 мың дана тауық жұмыртқасы жеткізілді. Солтүстік Қазақстан облысы 1 000 тоннадан астам өнім ұсынды: 110 тонна ет және ет өнімдері, 400 тоннадан астам көкөніс, 180 тоннадан астам сүт өнімдері, 80 тоннадан астам бакалея, 5 тонна балық, 10 тонна бал және 240 мың дана тауық жұмыртқасы. Ұлытау облысының шаруалары 60 тонна ет және ет өнімдері мен 20 тонна сүт өнімдерін әкелді.
Жәрмеңкеде ет және ет өнімдері, сүт өнімдері, көкөніс, жұмыртқа, балық, бал, бакалея және басқа да азық-түлік түрлері сатылады.
«Біз үшін өнімді тікелей сатып алушыға ұсынудың маңызы зор. Жәрмеңкеге келген адамдар тауардың бағасын сұрап, сапасын көріп, өзіне қажетті мөлшерде сатып ала алады. Мұнда бірнеше өңірдің өндірушілері жиналғандықтан, тұрғындардың таңдау мүмкіндігі де кеңейеді. Әсіресе, күнделікті тұтынатын ет, сүт өнімдері мен көкөністерге сұраныс жоғары. Осындай сауда алаңдары арқылы өнімімізді көбірек адамға таныстырып, тұрақты тұтынушылармен байланыс орнатуға болады», – деді Солтүстік Қазақстан облысынан келген сатушы Айдос Сәрсенбаев.
Астана тұрғыны Әйгерім Қасымованың айтуынша, мұндай жәрмеңкелер отбасылық бюджетті жоспарлауға көмектеседі. «Азық-түлік – әр отбасының күнделікті шығыны. Сондықтан сапалы өнімді қолайлы бағамен сатып алу біз үшін маңызды. Жәрмеңкеде әр өңірден келген өндірушілердің тауарлары ұсынылғандықтан, бірден бірнеше өнім түрін таңдап алуға болады. Сонымен қатар, тауардың қайдан жеткізілгенін біліп, өндірушінің өзінен сұрап алуға мүмкіндік бар. Осындай жәрмеңкелер тұрақты ұйымдастырылып тұрса, қала тұрғындары үшін де, өнімін сатуға келген шаруалар үшін де тиімді болар еді», – деді ол.
