Алматы облысында киберполиция 13 млн теңгелік алаяқтықтың алдын алды

Алматы облысы полиция департаментінің киберқылмысқа қарсы бөлімшесі тағы бір интернет-алаяқтықтың жолын кесті. Бұл туралы Aikyn.kz хабарлайды.

Күдікті әрекеттер «Қазақтелеком» АҚ-мен бірлесіп жасалған арнайы жүйе арқылы анықталды. Киберполиция қызметкерлері дереу ықтимал құрбанның жұмыс орнына барды. Алаяқтардың сеніміне көнген ер адам олардың барлық талаптарын орындап жүрген.

Қаскөйлер оны жақындарынан оқшаулануға, полиция мен туыстарының қоңырауларына жауап бермеуге, сондай-ақ бірнеше банктен несие алуға көндірген. Осылайша, ол алаяқтардың тұрақты психологиялық қысымында болған.

Полиция ер адаммен байланысуға тырысқанымен, ол тіпті отбасы мүшелерінің қоңырауларын да елемеген. Сондықтан киберполиция оның жұбайы мен балаларын тауып, жағдайды түсіндірді. Туыстарына банктерге хабарласып, ықтимал несие рәсімдеу әрекеті туралы ескерту ұсынылды. Нәтижесінде банктер несие беруден бас тартты, бұл ірі қаржылық шығынның алдын алды.

Ер адамды полиция өндірістік база аумағынан тапты. Оған жағдайды түсіндіруге тырысқанымен, ол бейтаныс адамдарға сенуді жалғастырып, тіпті өз ұлына да сенбеді. Тек 13 миллион теңгеден астам несие рәсімдеп, ақшаны алаяқтарға беруге шақ қалғанда ғана ол жағдайдың ауырлығын ұқты.

Бұл оқиға қаскөйлердің құрбандарына психологиялық ықпалының күшті екенін көрсетеді. Олар азаматтарды жақындарынан және құқық қорғау органдарынан оқшаулап, өз нұсқауларын орындауға мәжбүрлейді.

Полицияның мәліметінше, күдікті қоңырауларды жедел анықтау қылмысқа дер кезінде араласуға мүмкіндік береді. Бір тәулік ішінде Алматы облысында осы жүйенің арқасында интернет-алаяқтықтың 13 фактісінің жолы кесілді.

Полиция азаматтарды сақ болуға шақырады: егер белгісіз адамдар қоңырау шалып, әңгімені ешкімге айтпауға, несие алуға, ақша аударуға немесе бөгде қосымшаларды орнатуға көндірсе, әңгімені дереу тоқтатып, банкке немесе құқық қорғау органдарына хабарласыңыз. Алаяқтардың сізді жақындарыңыздан оқшаулауына жол бермеңіз.