Әлеуметтік желі ықпалымен Ұлттық ұланға келген барабаншы
Шымкенттік барабаншы Әлішер Олжабай әлеуметтік желідегі видеолардың ықпалымен Ұлттық ұлан қатарына қосылып, әскери оркестрде өнерін жалғастыруда.
Шымкенттік музыкант Әлішер Олжабай бүгінде әскери форма киіп, ІІМ Ұлттық ұланның 5573 әскери бөлімінде қызмет етуде. Ол бұған дейін сахнада барабанда ойнап, көрерменнің қошеметіне бөленген. Сахна мен әскери сап арасындағы айырмашылыққа қарамастан, ол үшін екеуін байланыстыратын ортақ нәрсе бар — музыка.
Әлішердің әскери өмірге келуіне TikTok пен Instagram желілерінде көрген ақпараттар себеп болған. Әлеуметтік желіден Ұлттық ұланның әскери оркестрлерінде кәсіби музыканттарға мүмкіндік бар екенін байқаған ол, көп ойланбастан, өнерін армияда жалғастыруды шешкен. Осылайша, бір видео оның өмірінде жаңа кезеңнің басталуына түрткі болды.
Кәсіби музыкант болуы әскери тәртіптен босатпайды. Қатардағы Әлішер Олжабай алғашқы күндері саптық дайындықтан өтіп, күн тәртібіне бейімделді. Музыкада дирижердің қимылына қарап жүрсе, әскерде командирдің пәрменіне құлақ асуды үйренді.
Дегенмен оның музыкаға деген қызығушылығы әскери қызметпен қатар жалғасын тапты. Ұлттық ұландағы әскери оркестрлер салтанатты шаралар мен әскери рәсімдердің ажырамас бөлігі саналады. Мұндай ұжымдарда кәсіби музыканттардың тәжірибесі мен шеберлігі ерекше қажет. Сондықтан Әлішердің сахнада жинаған тәжірибесі әскери ортада да кәдеге жарады.
Әскери шерулер мен салтанатты рәсімдерде барабаншының орны ерекше, себебі барабан үні жай ғана дыбыс емес, әскери рәсімнің бір бөлігі. Әлішердің кәсіби деңгейін байқаған оркестр ұжымы оған қолдау көрсетіп, бос уақытында жаттығуына мүмкіндік беруде. Оның ендігі мақсаты — әскери қызметін келісімшарт негізінде жалғастырып, Ұлттық ұлан оркестрінің құрамында өнер көрсету.
