Air Astana Алматы мен Астанадан Оманның Салала қаласына тікелей рейс ашады
Air Astana 23 қазаннан бастап Алматы – Салала, 24 қазаннан бастап Астана – Салала бағыттары бойынша аптасына бір рет рейс орындайды.
Қазан айының соңынан бастап Қазақстаннан Оманның Салала қаласына екі жаңа халықаралық әуе бағыты іске қосылады. Бұл туралы Көлік министрлігі хабарлады.
Air Astana әуе компаниясы 23 қазаннан бастап Алматы – Салала бағыты бойынша ұшатын болады. Рейстер аптасына бір рет, жұма күндері орындалады.
Ал 24 қазаннан бастап Астана – Салала бағыты ашылады. Елордадан ұшақтар аптасына бір рет, сенбі күндері қатынайды. Екі бағытта да Airbus A320 ұшақтары пайдаланылады.
Қазір Қазақстан мен Оман арасында Алматы – Маскат бағыты бойынша тұрақты әуе қатынасы жұмыс істейді. Бұл бағытта Salam Air компаниясы қызмет көрсетеді. Көлік министрлігінің мәліметінше, жаңа рейстер екі ел арасындағы туристік, іскерлік және сауда-экономикалық байланыстарды кеңейтуге мүмкіндік береді.
Салала – Оманның оңтүстігіндегі Дофар өңірінің әкімшілік орталығы. Қала Араб теңізінің жағалауында орналасқан және жағажай демалысымен танымал. Жаңа бағыттардың ашылуы қазақстандықтарға Оманның астанасы Маскатқа соқпай-ақ, Салалаға тікелей ұшуға мүмкіндік береді.
