Астанада Республика күніне орай 120-дан астам іс-шара өтеді

5 қазанда Қазақстан Республика күнін атап өтеді. Осыған байланысты Астанада 120-дан астам салтанатты, мәдени-танымдық, білім беру, спорттық, экологиялық және әлеуметтік іс-шаралар ұйымдастырылады. Бұл туралы елорда әкімдігінің ресми сайты хабарлады.

Мереке қарсаңында қалада бірнеше жаңа нысан ашылады. Атап айтқанда, М. Төлебаев көшесі, 3 мекенжайында «TANYM SPORT» спорт кешені, Сұлтан Бейбарыс көшесі, 15 мекенжайында «TANYM ART» өнер кешені іске қосылады. Сонымен қатар №2 қалалық балалар ауруханасының қосымша ғимараты мен №2 көпбейінді аурухананың қабылдау-диагностикалық кешені ашылады.

Мәдени бағдарлама аясында 20 қазан күні сағат 17:00-де «Жастар» сарайында «Елім деп соққан жүрегім» патриоттық кеші өтеді. 21 қазан күні сағат 11:00-де Сәкен Сейфуллин музейінде «Ұлт рухын ұлықтаған Сәкен» атты мәдени кеш ұйымдастырылады. 22 қазан күні сағат 19:00-де «Астана» эстрадалық-симфониялық оркестрі «Жастар» сарайында «Ұлы дала әуені» концертін ұсынады. 23 қазан күні сағат 19:00-де «НАЗ» мемлекеттік би театры «Аңсаған арман» концертін өткізеді. 24 қазан күні қаланың алты ауданында, оның ішінде Пригородный, Отау, Өнеркәсіп, Бағыстан, Өндіріс және Теміржолшылар тұрғын алаптарында, сондай-ақ бірнеше гүлзар мен қалалық алаңда мерекелік концерттер ұйымдастырылады. 25 қазан күні театрлар мен музейлер арнайы бағдарламалар ұсынады: сағат 11:00-де Өнер музейінде «Рухты ел» лекция-концерті, сағат 16:00-де Музыкалық жас көрермен театрында «Қазақстан өнерінің мақтаныштары» шығармашылық кеші өтеді, ал сағат 18:00-де «Абай – Тоғжан» музыкалық драмасы мен «Жас Абай» спектаклі көрсетіледі.

24-25 қазан күндері «Қазанат» ипподромының автотұрағында (Қарқаралы тасжолы, 1) ауыл шаруашылығы жәрмеңкесі өтеді. Жәрмеңке сағат 09:00-ден 18:00-ге дейін жұмыс істейді, онда Қарағанды және Қостанай облыстарының шаруалары азық-түлік өнімдерін ұсынады.

Спорттық іс-шаралар легі де жоспарланған. 15-17 қазан аралығында «Барыс Аренада» жүзуден әлем кубогының кезеңі өтеді. 17-18 қазан күндері Sana Sport кешенінде волейбол турнирі ұйымдастырылады. 19 қазан күні тоғызқұмалақтан Астана чемпионаты, 20 қазан күні шахматтан ашық қалалық чемпионат өтеді. 22 қазан күні зейнеткерлер арасында шахмат турнирі және студенттер арасында ұлттық спорт жарыстары ұйымдастырылады. 23 қазан күні Қаламгерлер аллеясында тоғызқұмалақ, асық ату, армрестлинг және ләңгі тебуден жарыстар өтеді. 24 қазан күні «Барыс Аренада» күрес түрлерінен әлем чемпионаты өтеді. Жүзу және күрес жарыстарына кіру үшін билет қажет.

Оқушылар мен жастарға арналған іс-шаралар да қарастырылған. 20-24 қазан аралығында елордалық мектептерде «Егер мен Президент болсам…» тақырыбында пікірсайыстар және «Менің елім – Қазақстан» сурет байқауы өтеді. Кітапханаларда жазушылармен кездесулер, әдеби кештер, музейлерде танымдық бағдарламалар ұйымдастырылады. 25 қазан күні әлеуметтік осал санаттағы балалар үшін Ұлттық музей мен «Бәйтерек» монументіне арнайы экскурсиялар өткізіледі.