Украина танктерді FPV-дрондармен қорғаудың жаңа тактикасын қолдануда

Украина әскері ұрыс даласында броньды техниканы қорғаудың жаңа әдістерін енгізуде. Бұл туралы Forbes басылымына сілтеме жасай отырып, Aikyn.kz хабарлайды.

Ресей-Украина соғысының бастапқы кезеңінде танктер шешуші рөл атқарғанымен, соққы беруші дрондардың кең таралуы олардың мүмкіндіктерін шектеп, екі жақты да жаяу әскерге көбірек жүгінуге мәжбүр етті.

Forbes мәліметінше, украин әскері танктер мен Bradley жаяу әскердің жауынгерлік машиналарын FPV-дрондармен бірлесіп қолдана бастаған. Мұндай дрондар қарсыластың ұшқышсыз аппараттарын әуеде ұстап, броньды техниканы қорғайды. Сонымен қатар техникаға металл шыбықтардан жасалған қосымша қорғаныс орнатылады, бұл құрылым қарсылас дрондарының негізгі сауытқа жетпей жарылуына мүмкіндік береді.

Жарияланған бейнежазбалардың бірінде Bradley машинасына дрон соққы жасағанымен, техника қозғалысын жалғастырған.

Басылымның жазуынша, Украина әскері қазір екі-үш броньды машинадан тұратын шағын топтарды пайдалануға басымдық беріп отыр. Мұндай тәсіл техниканы әуеден қорғауды жеңілдетеді.

Дегенмен жаңа тактиканың да осал тұстары бар. Қорғаныс дрондарының жұмысы уақытша үзіліп қалуы мүмкін. Ал қосымша сауыт бірнеше мәрте жасалған шабуылдан толық қорғай алмайды.

Forbes сарапшысының пікірінше, алдағы уақытта танктердің тиімділігі қарсылас дрондарына қарсы әуеде жергілікті басымдық орната алу мүмкіндігіне байланысты болады. Сондықтан заманауи соғыста танктердің рөлі жойылып жатқан жоқ, керісінше оларды қолдану тәсілдері өзгеріп келеді.