Қазақстандық инспекторлар жүк құрамы сәйкессіздігін анықтады

ҚР Ауыл шаруашылығы министрлігі АӨК мемлекеттік инспекция комитетінің облыстық аумақтық инспекциясы мамандары автокөлік құралын тексеру кезінде ілеспе құжаттардағы мәліметтер мен жүктің нақты құрамының арасында сәйкессіздік барын анықтады.

Тексеру барысында көлік құралында кебекпен қатар бидай дәні де тасымалданғаны белгілі болды.

Бидайды автомобиль көлігімен тасымалдауға қойылатын шектеулерді және ілеспе құжаттардағы мәліметтердің нақты жүк құрамына сәйкес келмейтінін ескеріп, жүкті экспорттаушы елге кері қайтару туралы шешім қабылданды.

Ауыл шаруашылығы министрлігі карантинге жатқызылған өнімдерді, оның ішінде Еуразиялық экономикалық одақ аясында тасымалдау кезінде фитосанитариялық талаптардың сақталуын қамтамасыз ету бағытындағы жұмыстарды жалғастыруда.

Ілеспе құжаттарда көрсетілген мәліметтердің дұрыстығы мен белгіленген шектеулердің сақталуы министрліктің тиісті комитетінің тұрақты бақылауында.