Алматы тауларында құтқарушылар жартастан түсе алмай қалған екі жасөспірімді алып шықты
Алматы тауларында құтқарушылар Тұйық-Су шатқалындағы «Горбунова» жартасынан түсе алмай қалған екі жасөспірімді қауіпсіз жерге түсірді.
Алматы маңындағы тауларда құтқарушылар жартастан өздігінен түсе алмай қалған екі жасөспірімге көмек көрсетті. Бұл оқиға Медеу ауданындағы Тұйық-Су шатқалындағы «Горбунова» жартасында болған.
Төтенше жағдайлар министрлігінің мәліметінше, жасөспірімдер альпинистік құрал-жабдықтарды пайдаланғанымен, жартастан төмен түсуге мүмкіндік болмаған. Оқиға орнына Алматы қаласы Мониторинг және жедел әрекет ету орталығының құтқарушылары жетіп, оларды қауіпсіз жерге түсіріп, аялдамаға дейін жеткізген.
Жасөспірімдер медициналық көмекке мұқтаж болмаған, кейін олар үйлеріне өздері қайтқан.
ТЖМ тауға шығар алдында маршрутты жоспарлап, ауа райы мен күннің бату уақытын ескеруге, сондай-ақ туристік соқпақтардан шықпауға шақырады.
