Мұнайшылар кәсіби мерекесі қарсаңында депутаттар еңбегін атап өтті

Құрылтай депутаттары Бегалы Ералиев пен Бауыржан Жамалов мұнай-газ саласы қызметкерлерінің еңбегіне ерекше назар аударып, олардың кәсіби мерекесіне орай құрмет көрсетті. Олардың пікірінше, мұнайшы мамандығы – маңдай термен келетін абыройлы кәсіп, сондықтан осы салада жүрген жұмысшылардың ерен еңбегі әрдайым құрметке лайық.

Қазақстанда мұнай-газ кешені қызметкерлері күні қыркүйек айының бірінші жексенбісінде аталып өтіледі. 2026 жылы бұл кәсіби мереке 6 қыркүйекке сәйкес келеді. Бұл күн сала мамандарының кәсіби шеберлігі мен қажырлы еңбегін құрметтеуге арналған.

Мұнай-газ саласы – еліміздің әлеуметтік-экономикалық дамуына, энергетикалық қауіпсіздігіне және өндірістік әлеуетінің артуына елеулі үлес қосып отырған стратегиялық маңызды салалардың бірі. Мұнай мен газды өндіру, өңдеу, тасымалдау және халыққа жеткізу бағыттарында мыңдаған маман күн сайын жауапты қызмет атқарып келеді.

Әрбір жетістіктің артында жоғары кәсібилік, мол тәжірибе, жауапкершілік және тынымсыз еңбек тұр. Кен орындарында, өндірістік кәсіпорындарда, мұнай өңдеу зауыттарында және газ инфрақұрылымы нысандарында қызмет атқаратын мамандар еліміздің тұрақты дамуына өз үлестерін қосып жүр.

Соңғы жылдары Қазақстанда мұнай өңдеу, мұнай-газ химиясы және газ саласын дамытуға, жаңа өндірістер мен жұмыс орындарын құруға ерекше көңіл бөлінуде. 2025 жылы еліміздің мұнай өңдеу зауыттарында 18,4 млн тонна мұнай өңделіп, газдандыру деңгейі 64 пайыздан асқаны хабарланды.