27 тамызда бірнеше өңірде дауылды ескерту жарияланды

Қазгидромет 27 тамызға арналған ауа райы болжамына байланысты бірқатар өңірде дауылды ескерту жасады. Синоптиктердің мәліметінше, еліміздің әртүрлі аймақтарында жаңбыр, найзағай, тұман, шаңды дауыл және күшті жел күтіледі.

Қызылорда облысының солтүстігінде түнде жаңбыр жауып, найзағай ойнайды, ал күндіз шаңды дауыл тұрады. Желдің екпіні күндіз облыстың солтүстігінде 15-20 м/с жетеді. Облыс бойынша төтенше өрт қаупі сақталады, Қызылорда қаласында да дәл осындай жағдай болжанады.

Ақтөбе облысының солтүстігінде түнде, ал солтүстік-шығысында күндіз аздап жаңбыр жауып, найзағай ойнайды. Түнде және таңертең облыстың орталығында тұман түседі. Желдің екпіні түнде облыстың оңтүстігінде, шығысында және орталығында 15-20 м/с болады. Облыстың орталығы мен солтүстік-шығысында жоғары өрт қаупі, ал жалпы облыс бойынша төтенше өрт қаупі сақталады. Ақтөбе қаласында да төтенше өрт қаупі жарияланды.

Ұлытау облысы мен Жезқазған қаласында, сондай-ақ Қарағанды облысының оңтүстігінде төтенше өрт қаупі сақталады. Атырау облысы мен Атырау қаласында да осындай қауіп бар.

Алматы облысында солтүстік-шығыстан және шығыстан жел соғады, күндіз облыстың шығысында оның екпіні 18 м/с жетеді. Облыстың орталығында, батысында және шығысында төтенше өрт қаупі сақталады. Қонаев қаласында да төтенше өрт қаупі жарияланды.

Жетісу облысының таулы аудандарында түнде және таңертең тұман түседі. Солтүстік-шығыстан соғатын желдің екпіні облыстың шығысында 15-20 м/с болады. Облыстың орталығында, оңтүстігінде және шығысында төтенше өрт қаупі сақталады, Талдықорған қаласында да осындай жағдай.

Шығыс Қазақстан облысының солтүстігінде түнде жаңбыр жауып, найзағай ойнайды, ал шығысы мен таулы аудандарында жауын-шашын (жаңбыр, қар) күтіледі. Түнде және таңертең облыстың солтүстігі мен шығысында тұман болжанады. Күндіз облыстың солтүстігі мен шығысында оңтүстік-батыстан шығысқа қарай соғатын желдің екпіні 15-18 м/с жетеді.

Абай облысының солтүстігі мен орталығында тұман түседі, ал оңтүстік-батысында төтенше өрт қаупі сақталады. Маңғыстау облысының батысында, солтүстігінде және орталығында жаңбыр жауып, найзағай ойнайды. Солтүстік-шығыстан соғатын желдің екпіні 15-20 м/с болады. Облыстың батысы мен солтүстігінде төтенше өрт қаупі сақталады, Ақтауда да осындай жағдай.

Қостанай облысында жаңбыр жауып, найзағай ойнайды, солтүстік пен батыста кей уақытта нөсер жаңбыр болса, күндіз батыс пен шығыста бұршақ түсіп, дауыл тұрады. Солтүстік-батыстан соғатын желдің екпіні облыстың оңтүстігі мен шығысында 15-20 м/с жетеді. Облыстың солтүстік-батысы мен шығысында жоғары өрт қаупі, ал оңтүстігінде, оңтүстік-шығысында және орталығында төтенше өрт қаупі сақталады. Қостанай қаласында жаңбыр жауып, найзағай ойнайды.

Батыс Қазақстан облысының солтүстігінде күндіз жаңбыр жауып, найзағай ойнайды. Облыс бойынша төтенше өрт қаупі, ал солтүстік-батысында жоғары өрт қаупі сақталады. Орал қаласында күндіз жаңбыр жауып, найзағай ойнайды.

Павлодар облысының батысы мен солтүстігінде түнде және таңертең тұман түседі. Күндіз облыстың солтүстігі мен шығысында оңтүстік-шығыстан соғатын желдің екпіні 15-20 м/с болады.

Ақмола облысының батысында, солтүстігінде және оңтүстігінде күндіз жаңбыр жауып, найзағай ойнайды, бұршақ түсіп, шаңды дауыл тұрады. Күндіз облыстың батысында, солтүстігінде және оңтүстігінде оңтүстіктен және оңтүстік-батыстан соғатын желдің екпіні 15-20 м/с, кей жерлерде 25 м/с дейін жетеді. Көкшетауда күндіз жаңбыр жауып, найзағай ойнайды, желдің екпіні 15-18 м/с болады.

Солтүстік Қазақстан облысының батысында, солтүстігінде және оңтүстігінде түнде және күндіз жаңбыр жауып, найзағай ойнайды, батыс пен солтүстікте нөсер жаңбыр, бұршақ және шаңды дауыл күтіледі. Түнде және таңертең облыстың оңтүстігі мен шығысында тұман болжанады. Желдің екпіні батыста, солтүстікте және оңтүстікте 15-20 м/с, ал батыс пен солтүстікте 25 м/с жетеді. Петропавлда жаңбыр жауып, найзағай ойнайды, күндіз бұршақ түсіп, дауыл тұрады. Желдің екпіні 15-20 м/с, кей жерлерде 25 м/с дейін жетеді.

Жамбыл облысының оңтүстік-батысында, солтүстік-шығысында және таулы аудандарында солтүстік-шығыстан соғатын желдің екпіні 15-20 м/с болады. Облыс бойынша төтенше өрт қаупі сақталады, Тараз қаласында да осындай жағдай.

Түркістан облысының батысы мен солтүстігінде күндіз шаңды дауыл тұрады. Облыстың батысында, солтүстігінде, таулы және тау бөктерлі аудандарында солтүстік-шығыстан соғатын желдің екпіні 15-20 м/с жетеді. Өңірде төтенше өрт қаупі сақталады. Шымкентте төтенше өрт қаупі жарияланса, Түркістанда солтүстік-шығыстан соғатын желдің екпіні 15-20 м/с болады.