Шымкентте жас теннисшілер арасында Қазақстан кубогы старт алды
Шымкент қаласында 14 жасқа дейінгі теннисшілер арасында Қазақстан кубогының командалық біріншілігі басталды. Бұл туралы Aikyn.kz хабарлады.
Жарыс 24-29 тамыз аралығында өтіп, еліміздің түкпір-түкпірінен келген жас спортшыларды біріктіреді. Турнир ұлдар мен қыздар арасында жеке-жеке өтеді.
Әр санаттағы командалар алғашқы кезеңде A, B, C және D деп аталатын төрт топқа бөлінген. Ұлдар арасындағы жарысқа 16 команда қатысады. Олардың қатарында Астана, Алматы, Шымкент қалаларының командалары, сондай-ақ Ақмола, Ақтөбе, Атырау, Жамбыл, Жетісу, Батыс Қазақстан, Қарағанды, Қостанай, Қызылорда, Павлодар, Солтүстік Қазақстан және Түркістан облыстарының өкілдері бар.
Теннис федерациясының мәліметінше, қыздар арасындағы жарысқа да 16 команда қатысады. А тобында Жетісу, Атырау, Жамбыл облыстары мен Шымкент командасы, B тобында Астана-2, Ақтөбе, Қостанай және Ақмола облыстары, C тобында Қарағанды, Павлодар, Солтүстік Қазақстан облыстары мен Алматы-1, ал D тобында Астана-1, Алматы-2, Түркістан және Батыс Қазақстан облыстары кездеседі.
Алғашқы матчтар 24 тамызда өтеді. Сол күні ұлдар мен қыздар командалары кортқа шығады. Әр командалық кездесу екі жекелей және бір жұптық матчтан тұрады.
Топтық кезеңнің қорытындысы бойынша үздік командалар басты жүлде үшін күресті жалғастырады. Қазақстан U14 кубогының жеңімпаздары мен жүлдегерлері 29 тамызда анықталады.
Қазақстан Кубогы жасөспірімдер теннисінің күнтізбесіндегі маңызды республикалық командалық жарыстардың бірі саналады. Турнир жас спортшыларға өз өңірлерінің намысын қорғап, жарыс тәжірибесін жинауға мүмкіндік береді.
