Тоқаев ТМД волонтерлер форумында еріктілік саясатын таныстырды

Қасым-Жомарт Тоқаев Астанада өтіп жатқан ТМД волонтерлер форумына қатысқан БҰҰ Еріктілер бағдарламасының атқарушы үйлестірушісі Тойли Курбановпен кездесу өткізді. Президент Қазақстанның волонтерлік бастамаларды дәйекті түрде қолдағаны үшін алғыс білдірді.

Мемлекет басшысы еліміздің волонтерлік қозғалысты дамытуға ерекше мән беретінін атап өтті. Бұған дәлел ретінде Қазақстанның 2026 жылды БҰҰ Бас Ассамблеясы қолдаған орнықты даму жолындағы Халықаралық еріктілер жылы деп жариялау жөніндегі ұсынысын келтірді.

– Біз еріктілікті мемлекеттік саясат тұрғысынан алғанда, шынайы патриотизмнің және жастарға көрсетілетін мемлекеттік қолдаудың көрінісі ретінде қарастырамыз. Менің бастамаммен жаңа Конституцияға волонтерлік қағидалары енгізілді. Онда волонтерлік қызметті ынталандыру алғаш рет конституциялық деңгейде бекітілді, – деді Президент.

Мемлекет басшысының айтуынша, Қазақстанда Халықаралық еріктілер жылы аясында мыңнан астам іс-шара өтуде, ал волонтерлер саны 300 мыңға жақындады. Сонымен қатар волонтерлік қозғалыстың 2030 жылға дейінгі даму тұжырымдамасы әзірленіп жатыр. Волонтердің цифрлық паспорты енгізіліп, мемлекеттік қолдау тетіктері мен өңірлік инфрақұрылым жетілдірілуде.

Тойли Курбанов БҰҰ Еріктілер бағдарламасымен жоғары деңгейде ынтымақтастық орнағанына тоқталып, Халықаралық еріктілер жылы аясындағы бірлескен жұмыстарды атап өтті. Ол волонтерлік қозғалысты ілгерілетуге назар аударғаны үшін Қазақстан Президентіне алғыс айтты.

– Қазақстан – волонтерлік қызмет саласында үлкен биіктерді бағындырған бірегей ел. Қазақстанның Еріктілер жылын жариялау жөніндегі бастамасын 60-тан аса мемлекет қолдады. Сіздер жаһандық тренд қалыптастырып жатырсыздар. «Таза Қазақстан» сияқты қоғамдық акцияларыңыз бірқатар елде үлкен қызығушылық тудыруда, – деді БҰҰ Еріктілер бағдарламасының атқарушы үйлестірушісі.