Қазақстанда қоғамдық көлік пен таксиге сұраныс артты
2026 жылы Қазақстанда қоғамдық көлік пен таксиге сұраныс артып, жолаушылар ағыны 1,1 млрд-қа жетті. Табыс 303,1 млрд теңгеге өсті.
2026 жылдың қаңтар–шілде айларында елдегі автомобиль және қалалық электр көлігімен 1,1 млрд жолаушы тасымалданған. Бұл былтырғы осы кезеңмен салыстырғанда 4,6 пайызға көп. Көлік кәсіпорындарының табысы 303,1 млрд теңгеге жетіп, 13,9 пайызға өскен.
Табыстың негізгі бөлігін автобустар мен такси құраған. Автобустар 192 млрд теңге табыс әкелген, бұл бір жылда 15,5 пайызға артық. Нақты мәнде өсім 11,6 пайызды құраған. Такси қызметі 101 млрд теңге тауып, номиналды табысы 10,5 пайызға өскен, алайда баға өзгерісін ескергенде нақты табыс 3,2 пайызға кеміген.
Такси жолаушыларының саны 88,8 млн адамға жетіп, бір жыл бұрынғыдан 3,2 пайызға артқан. Дегенмен сапар санының өсуі таксистердің нақты табысына әлі әсер етпеген. Автобустар негізгі көлік түрі болып қалуда: жеті айда 971,7 млн адамды, яғни жолаушылардың шамамен 90 пайызын тасымалдаған.
Жолаушылар ең көп тасымалданған өңірлер — Алматы (267,5 млн) және Астана (188,3 млн). Осы екі қалаға жалпы ағынның 41 пайызы тиесілі. Шілдеде қалалық такси бағасы бір жылда 13,4 пайызға, ал автобустардағы жол ақысы 3,3 пайызға қымбаттаған.
Жолаушылар ағыны бірнеше жылдан бері өсіп келеді. 2022 жылғы қаңтар–шілдемен салыстырғанда 41,2 пайызға — 786 миллионнан 1,1 млрд сапарға дейін артқан. Алайда өсу қарқыны бәсеңдеген: 2023–2025 жылдары жыл сайын 9–11 пайыз болса, қазір 5 пайыздан аз.
