Колумбиядағы жер сілкінісінен қаза тапқандар 254-ке жетті

Колумбияның батысындағы қуатты жер сілкінісі салдарынан қаза тапқандар саны 254 адамға жетті. Құтқарушылар әлі де үйінді астында қалған адамдарды іздестіруде.

Reuters агенттігінің мәліметінше, дүйсенбі күні болған магнитудасы 7,4 жер сілкінісі елдің кофе өсіретін аймағына айтарлықтай зиян келтірген. Перейра қаласында 101 адам, ал Калиде 95 адам қаза тапқаны хабарланды. Эпицентрге жақын орналасқан Чоко аймағындағы көптеген елді мекен электр қуатынан және негізгі қызметтерден ажырап қалды.

Құтқару жұмыстары түні бойы жалғасты. Мамандар арнайы техникамен үйінділерді аршып, тірі қалғандарды іздеді. Кейбір учаскелерде адамдардың даусын есту үшін жұмысты тоқтатып, тыныштық сақтауға тура келді.

Жер сілкінісінен тұрғын үйлер, мектептер, медициналық орталықтар және басқа да ғимараттар қирап, мыңдаған адам баспанасыз қалды. Кейбір нысандарда үлкен жарықтар пайда болды.

Калиде құтқарушылар үйінді астынан тірі әйелді алып шыққанда, жиналған жұрт қуанышпен қарсы алды. Алайда қалалық мәйітхана қаза тапқандардың көптігінен толып кеткен.

Табиғи апат елдің көлік және инженерлік инфрақұрылымына да әсер етті. Алты әуежай уақытша жабылып, ондаған жол зақымданған. Чоко аймағының бірқатар елді мекенінде электр, су, байланыс және медициналық қызмет көрсету жүйелері әлі де бұзылған.

Сейсенбі күні таңертең жер сілкінісінен кейінгі жүзге жуық қайталама дүмпу тіркелді. Осыған байланысты тұрғындар қауіпсіздік үшін ашық алаңдарда қалуға мәжбүр болды.

Билік зардаптың нақты көлемін анықтауға бірнеше күн қажет болуы мүмкін екенін мәлімдеді. Құтқару жұмыстары жалғасуда.

Бұған дейін Мемлекет басшысы Қасым-Жомарт Тоқаев Колумбия президентіне көңіл айту жеделхатын жолдаған еді.