Астанада демалыс күндері мас күйінде көлік жүргізген 24 адам ұсталды

Астана полициясы демалыс күндері жүргізген рейд барысында алкогольдік масаң күйде көлік тізгіндеген 24 жүргізушіні анықтады.

Олардың бірі түнде қала көшелерінің бірінде Haval автокөлігін тоқтатқан. Рөлде отырған 38 жастағы ер адамның мас екендігі медициналық куәландырумен расталды.

Оған қатысты ҚР ӘҚБтК-нің 608-бабы 1-бөлігі бойынша әкімшілік хаттама толтырылып, сот оны 7 жылға көлік жүргізу құқығынан айырып, 15 тәулікке қамауға алды.

Полиция мас күйінде көлік жүргізудің жол қозғалысы қауіпсіздігіне, азаматтардың өмірі мен денсаулығына төндіретін қаупін ескертіп, жүргізушілерді жол ережелерін сақтауға шақырды.