ІІМ WhatsApp аккаунтын алаяқтардан қорғау жолдарын түсіндірді
ІІМ WhatsApp аккаунтын алаяқтардан қорғау жолдарын түсіндірді: екі сатылы тексеру, құрылғыларды тексеру және бұзылу белгілері туралы кеңестер.
Ішкі істер министрлігі WhatsApp мессенджеріндегі аккаунттарға рұқсатсыз қол жеткізу жағдайлары туралы ескертіп, пайдаланушыларды қауіпсіздік шараларын күшейтуге шақырады.
Министрлік танысыңыздан шұғыл түрде ақша аударуды сұраған хабарлама келсе, оған телефон арқылы немесе басқа байланыс құралы арқылы хабарласып, хабарламаны шынымен сол адамның жібергеніне көз жеткізуді ұсынады.
Екі сатылы тексеруді қосу
Аккаунт қауіпсіздігін арттыру үшін ІІМ екі сатылы тексеруді қосуды ұсынады. Ол үшін WhatsApp қосымшасын ашып, «Баптаулар» бөліміне өтіп, «Аккаунт», одан кейін «Екі сатылы тексеру» бөлімін таңдап, «Қосу» батырмасын басу керек. Алты таңбалы PIN-код орнатып, қолжетімділікті қалпына келтіруге арналған электрондық пошта мекенжайын енгізу қажет.
Орнатылған PIN-кодты ешкімге хабарламау маңызды. Сондай-ақ аккаунтқа қосылған құрылғыларды тұрақты тексеріп отыру керек. Ол үшін мәзірді (оң жақ жоғарғы бұрыштағы үш нүкте) ашып, «Байланыстырылған құрылғылар» бөлімін таңдап, қосылған құрылғылар тізімімен танысу қажет. Егер белгісіз құрылғы байқалса, оны таңдап, «Шығу» пәрменін басу арқылы қолжетімділікті дереу тоқтату керек.
Аккаунттың бұзылу белгілері
Аккаунттың бұзылғанын білдіретін негізгі белгілерге мыналар жатады: белгісіз құрылғылардың қосылуы, сіздің қатысуыңызсыз хабарламалардың жіберілуі, таныстарыңыздан сіздің атыңыздан күмәнді өтініштердің келіп жатқаны туралы хабарламалар, өзіңіз сұратпаған растау кодтарының SMS арқылы келуі, сондай-ақ аккаунттан өздігінен шығып кету.
Растау кодтарын ешкімге бермеу, күмәнді сілтемелерге өтпеу және бейтаныс адамдардың нұсқауымен бөгде қосымшаларды орнатпау қажет. Жеке деректердің қауіпсіздігіне жауапкершілікпен қарау керек.
Аккаунттың бұзылу белгілері анықталған жағдайда, оны қорғау бойынша шұғыл шаралар қабылдап, құқық қорғау органдарына жүгіну қажет. WhatsApp мессенджерінде рұқсатсыз белсенділік анықталғанда «Байланыстырылған құрылғылар» бөліміндегі барлық белсенді сеанстарды дереу аяқтап, екі сатылы тексерудің PIN-кодын өзгертіп, аккаунттың бұзылуы мүмкін екендігі туралы байланыстағы адамдарды хабардар ету керек. Сонымен қатар телефон мен компьютерді зиянды бағдарламалардың бар-жоғына тексеріп, SMS немесе мессенджер арқылы келген растау кодтарын үшінші тұлғаларға ешқашан бермеу қажет.
